Ռալֆ Լորենը թողարկում է Ռեյչել Գրինին նվիրված հավաքածու

25 տարի առաջ «Ընկերներ» ամերիկյան հեռուստասերիալն առաջին անգամ հայտնվեց  էկրաններին, այսինքն՝ արդեն 25 տարի է, ինչ մենք առաջին անգամ ծանոթացանք Ռեյչել Գրինի հագուստների ոճին: Եվ, ինչպես բոլոր երկրպագուներին է հայտնի, 10 տարվա աշխատանքի ընթացքում դերասանուհին իր կերպարները ներկայացնելու համար համագործակցել է Բլումինգդեյլսի (Bloomingdales-ի) և Ռալֆ Լորեն կորպորացիայի հետ: Այժմ այս երկու ապրանքանիշները, համախմբվելով ԱՄՆ-ի խոշոր կինոարտադրողներից Ուորներ Բրոսի (Warner Bros-ի) հետ, ստեղծել են նոր հավաքածու՝ նվիրված Գրինի աշխատանքային զգեստապահարանին:

Ռալֆ Լորենը պատրաստել է Wear To Work հավաքածուն ՝ հիմնված Ռեյչել Գրինի կերպարի ոճի վրա: Այն բաղկացած է Գրինի 90-ականների տարբեր հանդերձանքներից, որոնք 2019-ի համար թարմացվել են համապատասխան մոտիվներով: Հագուստներն ինչպես Polo Ralph Lauren, այնպես էլ Lauren Ralph Lauren շարքից են, ինչը նշանակում է, որ շատ հագուստներ կլինեն ավելի մատչելի, քան կարող էիք ակնկալել` սկսած £120-ից:

Հավաքածուն կցուցադրվի Բլումինգդեյլսում, որտեղ Ռեյչել Գրինը ստացել էր նորաձևության ոլորտում առաջին լուրջ աշխատանքը: Եթե Նյու Յորքում չեք, հոգ չէ, քանի որ այսօրվանից կարող եք ձեռք բերել հավաքածուից ձեր հավանած իրերն առցանց, ինչպես նաև Ռալֆ Լորեն խանութներում:

Աղբյուր՝ elle.com